Ռուսաստանի ազգային ավիափոխադրող «Աէրոֆլոտը» երկուշաբթի հայտարարել է, որ ավիաընկերության տեղեկատվական համակարգերում խափանում է առաջացել, ինչը կարող է ժամանակավորապես խաթարել ծառայությունների աշխատանքը։
«Արդյունքում որոշ չվերթների ժամանակացույցում ակնկալվում են փոփոխություններ, այդ թվում՝ ուշացումներ և չեղարկումներ», - նշված է «Աէրոֆլոտի» հաղորդագրության մեջ։
Ընկերությունը նշել է, որ «մասնագետներն աշխատում են՝ նվազեցնելու չվերթների ժամանակացույցի վրա ազդեցությունը և վերականգնելու ծառայությունների բնականոն ընթացքը», սակայն չի հայտնել խափանման ծավալի կամ հնարավոր պատճառների մասին։
Չնայած Ուկրաինայի դեմ պատերազմի համար Ռուսաստանի նկատմամբ սահմանված պատժամիջոցներին, «Աէրոֆլոտը» շարունակում է մնալ աշխարհի ուղևորատար ամենախոշոր 20 ավիաընկերություններից մեկը։
Ընկերության կայքում հրապարակված տվյալների համաձայն՝ 2024 թվականին «Աէրոֆլոտ» խմբի ուղևորահոսքը կազմել է 55.3 միլիոն ուղևոր։